सोर संदेश

स्वाभिमान ले आगू बढ़त हे आदिवासी समाज: डाॅ. रमन सिंह रायपुर/सिक्षा, स्वावलंबन के संगे संग प्रकृति ले जुड़े संस्कृति अउ परंपरा ल मजबूत करत छत्तीसगढ़ के आदिवासी समाज आगू बढ़त हे। विस्व आदिवासी दिवस के बेरा मं आयोजित सभा, इंडोर स्टेडियम बूढ़ातालाब परिसर रायपुर मं उक्त उद्गार व्यक्त करत मुख्य मंत्री डाॅ. रमन सिंह कहिन, जंगल के संरक्षण मं आदिवासी समाज के बहंुत बड़े योगदान हे। राज्य सरकार द्वारा बजट के 35 प्रतिसत हिस्सा आदिवासी क्षेत्र के विकास बर खरचा करे जाथे। दंतेवाड़ा के आदिवासी लइका मनके सिक्षा योजना पूरा देस भर मं बेहतर माडल हे। ये बेरा मं छत्तीसगढ़ के अमर सहीद वीर नारायण हिंह, गुण्डाधूर, गेंद सिंह, रानी दुर्गावती समेंत सहीद मनला याद करे गइस। इहां मुख्य मंत्री द्वारा आदिवासी मनके संगे संग अन्य समाज के घलव प्रतिभावान, उल्लेखनीय काम करइया मनके सम्मान करे गइस। खाद्यान्न योजना के बात करत इहां रमन सिंह कहिन के आज छत्तीसगढ़ मं कउनों लांघन नई सुतंय। राज सरकार वनवासी मनके पांव मं कांटा गड़े के घलव चिंता करथे। तेंदू पत्ता संग्रह करइया मनला सरकार 14 लाख चरण पादुका देय हे। सिक्षा के द्वारा पाढ़ी के निर्माण के काम राज सरकार करत हे। बस्तर मं कनेक्टीविटी के क्रांतिकारी योजना चलाय जात हे। येमा सड़क, एयर बस, बिजली, कृसि क्षेत्र के संगे संग टेलीकाॅम संचार योजना सामिल हे। अवइया तीन महिना मं 40 लाख महिला मनके हांथ मं स्मार्ट फोन रइही। येकर ले उंकर जीवन मं सकारात्मक परिवर्तन के संभावना देखे जात है। जनजाति के जाति प्रमाण पत्र मं बनाय मं होवइया कठिनाई ल दूर करे के काम होवत हे। मात्रा अउ सब्द के त्रुटि के सुधार करे गेय हे। अब जाति प्रमाण पत्र बनाए मं होवइया समस्या हट गेय हे। अब ये प्रमाण पत्र बनाना सरल हो गइस हे। ये सभा मं अपन बात रखत वन मंत्री महेस गागड़ा कहिन के हमर संस्कृति हमर पहिचान हे। समाज के लोगन अपन गौरवसाली संस्कृति ल बचाए रखंय। सासन के जनकल्याणकारी योजना के जानकारी देवत उन कहिन, आदिम जाति विकास विभाग ये क्षेत्र मं अनेक योजना मं काम करत हे। ये हमर उपलब्धि आय। ये विसय मं विकास की गाथा पुस्तक अवलोकनीय साधन हे। ये बेरा मं विकास की गाथा पुस्तक संग अंत्यावसायी वित्त अउ विकास निगम के वार्सिक प्रतिवेदन जनजाति आयोग के अध्यक्ष जीआर राना द्वारा संकलित पुस्तक के विमोचन करे गईस।