पूर्व मुख्यमंतरी अजीत जोगी कोमा म, डॉक्टर मन कहिन- स्थिति खराब, अवइया 48 घंटा महत्वपूर्ण

पूर्व मुख्यमंतरी अजीत जोगी कोमा म, डॉक्टर मन कहिन- स्थिति खराब, अवइया 48 घंटा महत्वपूर्ण

10-May-2020

रायपुर। छत्तीसगढ़ के पहिली मुख्यमंतरी व जनता कांग्रेस जोगी के रास्टीय अध्यक्ष अजीत जोगी ल सनिच्चर के दिल के दौरा पड़े के बाद श्रीनारायणा अस्पताल म भरती कराय गिस। आज वो कोमा म चले गेय हे। ओकर हालत अब्बड़ चिंताजनक हे अऊ अवइया 48 घंटा होकर बर महत्वपूर्ण हवय।

श्रीनारायणा अस्पताल ले जारी मेडिकल बुलेटिन के अनुसार अजीत जोगी के अस्पताल म 8 डॉक्टर देखरेख म इलाज चलत हे। जोगी के ह्रदय सामान्य हवय। ब्लड प्रेशर दवाइ ले नियंत्रित हे, फेर कालि रेस्पिरेटरी अरेस्ट होय के बाद कुछ समय तक ओकर मस्तिष्क म ऑक्सीजन नई पहुंच पाइस। येकर वजह ले ओकर दिमाग ल संभावित नुकसान पहुंचे हे। जेकर सेती अजीत जोगी कोमा म चले गिस। ओला वेंटिलेटर के माध्यम ले ऑक्सीजन देय जात हे।

मेडिकल डायरेक्टर डॉ. सुनील खेमका बताइस कि अजीत जोगी के स्वास्थ्य म सुधार करे के भरसक प्रयास करत हव। फेर अभी के स्थिति चिंताजनक हवय, अवइया 48 घंटा म ये समझ आहि की ओकर सरीर दवा ल कइसे रिस्पांस देवत हे।

छत्तीसगढ़ के पहिली मुख्यमंतरी अजीत जोगी ल हार्ट अटैक आय के बाद 9 मई के देवेंद्र नगर स्थित श्री नारायणा अस्पताल म भरती कराय गेय हवय। जउन बेरा ओला हार्ट अटैक आइस, तब वोहा गंगा अमली खात रहिस। जइसे ही अटैक आइस अऊ ओकर सांस रूक गिस। तुरते अस्पताल ले जाय के बाद कृत्रिम सांस देय गिस।


leave a comment