सीएम के पाठसाला म पढ़हइया लइका मन करिन सवाल, भूपेश कहिन- मेहनत अऊ लगन के कोनो बिकल्प नई हे...

सीएम के पाठसाला म पढ़हइया लइका मन करिन सवाल, भूपेश कहिन- मेहनत अऊ लगन के कोनो बिकल्प नई हे...

31-Jan-2020

रायपुर। राजधानी रायपुर के स्कूल के लइका मन बुधवार के सीएम के पाठसाला कार्यक्रम म मुख्यमंतरी भूपेश बघेल ले सफलता, सिक्षा, सफल लीडर, गुणवत्तापूर्ण तकनीकी सिक्षा, परीक्षा के डर ले उबरे के बिषय ऊपर रोचक सवाल करिन। मुख्यमंतरी ह रोचक तरीका अऊ सहज-सरल भाषा म पढ़हइया लइका मन के प्रश्न के जवाब दिस। कार्यक्रम के समाप्ति के बाद घलो लइका मन मुख्यमंतरी ले प्रश्न पूछत रहिस। मुख्यमंतरी लइका मन ले कहिन कि आपके मन म सवाल पूछे के उत्सुकता हे। ये जानकर मोला अच्छा लागिस। सवाल पूछे ले ही व्यक्ति के बिकास होथे। पढ़हइया लइका ल चाही कि जब तक ओकर प्रश्न के जवाब नई मिल जाए तब तक कोसिस करत रहय।

कार्यक्रम म एक छात्र मुख्यमंतरी ले पूछिस कि रईपुर म धरना, प्रदर्सन अऊ बंद के दौरान स्कूल म व्यवधान होथे। येकर बर सरकार काय व्यवस्था करत हे ? मुख्यमंतरी बताइस कि जिला प्रसासन ल निर्देस देय गिस हे कि धरना, प्रदर्सन अऊ हड़ताल के बेरा स्कूल-कालेज म पढ़हई म व्यवधान नई आए अऊ पढ़हइया मन ल असुविधा न हो। जबरदस्ती स्कूल-कालेज बंद करइया मन के बिरूद्ध कड़े कार्रवाई करे जाही।

एक छात्रा के सवाल के जवाब म मुख्यमंतरी कहिस कि सरकारी स्कूल के संग निजी स्कूल के पढ़हइया ल जिला स्तर म आयोजित खेल-कूद प्रतियोगिता म सामिल होय के अवसर मिलहि। मुख्यमंतरी कहिस कि नवा रईपुर के शहीद वीर नारायण सिंह अंतर्राष्ट्रीय क्रिकेट स्टेडियम म वन-डे अऊ इंटरनेशनल क्रिकेट मैच आयोजित करे के पहल करे जाही। अंतर्राष्ट्रीय क्रिकेट स्टेडियम के पढ़हइया मन भ्रमन घलो कराय जाही। स्कूल के छुट्टी के समय लगने वाला जाम के जवाब म मुख्यमंतरी कहिस कि साला प्रबंधन अऊ जिला प्रसासन ल स्कूल के छुट्टी के समय कुछ अंतराल रखे के व्यवस्था के निर्देश देय जाही। जेकर ले ट्रेफिक व्यवस्थित रहे।

पढ़हइया लइका मन सफलता कइसे मिलथे कहिस। मुख्यमंतरी बताइस कि लक्ष्य निर्धारित कर अऊ ओला हासिल करे ले सफलता मिलथे। लक्ष्य आप स्वयं निर्धारित करव। एक बार फेल होय ले कोई  असफल नई होरय। अपन सफलता आप ल खुद निर्धारित करना चाही। सफलता बर जरूरी गुण के संबंध म सीएम कहिस कि सफलता बर स्व-अनुसासन जरूरी हे। जब सारीरिक रूप ले मजबूत रहन, तभे स्वस्थ्य तन म स्वस्थ मन के वास होही अऊ अच्छे विचार आही। सफलता बर समय के सदुपयोग जरूरी हे। आगु कहिन कि कड़ी मेहनत के कोई बिकल्प नई हे।


leave a comment