जशपुर महोत्सव 2019 मुख्यंत्री ह जशपुर ल उघानिकी महाविघालय के सौगात दीन

जशपुर महोत्सव 2019 मुख्यंत्री ह जशपुर ल उघानिकी महाविघालय के सौगात दीन

13-Dec-2019

अगुवा न्यू़ज

जशपुर महोत्सव 2019 मुख्यंत्री ह जशपुर ल उघानिकी महाविघालय के सौगात दीन

हरेक मनखे के उन्नति अऊ भलाई सरकार के प्राथमिकता: श्री बघेल
तीन दिवसीय जशपुर महोत्सव के रंगारंग समापन

रायपुर, मुख्यमंत्री श्री भूपेश बघेल ह जशपुर जिला म उद्यानिकी महाविद्यालय खोले के घोषणा करे हें। उमन आज जशपुर जिला के कुनकुरी ब्लॉक मुख्यालय के तीर ग्राम पंचायत सलियाटोली म आयोजित तीन दिवसीय जशपुर महोत्सव के समापन कार्यक्रम ल संबोधित करत रहिन। उमन कहिन कि प्रदेश सरकार के प्राथमिकता राज्य के हरेक मनखे के उन्नति अऊ भलाई हे। उमन जशपुर महोत्सव के सफल आयोजन बर सबो मनखे मन ल बधाई अऊ शुभकामना देवत कहिन कि जशपुर जिला प्राकृतिक सौन्दर्य ले परिपूर्ण हे, इहां के मनखे मेहनतकश हे। इहां के मनखे मन के तरक्की बर सरकार हर संभव प्रयास करही। ये बेरा म मुख्यमंत्री ह विधायक श्री यू.डी.मिंज कोति ले जशपुर म पर्यटन ल लेके लिखे गए पुस्तक जशपुर टूरिज्म के विमोचन घलोक करिन।

मुख्यमंत्री श्री बघेल ह आगू कहिन कि जशपुर जिला म कटहल, स्ट्रॉबेरी, काजू, लीची, नाशपत्ती अऊ चाय के खेती होवत हे। एला बढ़ावा देहे के जरूरत हे। मुख्यमंत्री ह जशपुर जिला म उद्यानिकी फसल मन के खेती के अपार संभावना ल देखत जिला म उद्यानिकी महाविद्यालय खोले के ऐलान करिन। उमन जिला म किसान मन ल उंखर उपज के वाजिब मूल्य देवाए बर फूड प्रोसेसिंग प्लांट लगाए के दिशा म घलोक काम करे के बात कहिन। श्री बघेल ह जशपुर जिला म कृषि रोजगार, उद्यानिकी, एडवेंचर स्पोर्टस, ईको टूरिज्म ल बढ़ावा देहे बर कुनकुरी विधायक श्री यू.डी.मिंज के उदीम के सराहना करत कहिन कि ये दिशा म काम करे के जरूरत हे ताकि इहां के विकास ल एक नवा दिशा अऊ युवा मन ल रोजगार मिल सकय।

मुख्यमंत्री श्री बघेल ह ये मौका म कहिन कि किसान मन के धान 2500 रुपए क्विंटल म बिसाए के वायदा हर हाल म पूरा करे जाही। चाहे कतका अड़चने आवय, हम एखर से पीछू नइ हटन। उमन किसान मन ले कहिन कि आप मन के उपज के पैसा आप मन ल मिलना चाही। आप मन सब अपन ऋण पुस्तिका कोनो बिचौलिया अऊ व्यापारी ल झन देवव। जशपुर जिला म सिंचाई क्षमता ल बढ़ाए बर उमन शिखरपुर जलाशय अऊ ढोढ़ापानी जलाशय, के काम ल घलोक आगू बढ़ाए के बात कहिन।

कार्यक्रम ल कृषि मंत्री श्री रविन्द्र चौबे ह घलोक संबोधित करत कहिन कि जशपुर महोत्सव ह इहां के विकास के संभावना के दुवार खोल देहे हे। जशपुर जिला घलोक आन जिला मन के संग तरक्की के रद्दा म सरपट चलही। उमन कहिन कि हमर सरकार गांव वाले मन अऊ किसान मन ल आत्मनिर्भर बनाए के दिशा म काम करत हे। 2500 रुपए क्विंटल म धान खरीदी अऊ किसान मन के ऋण माफी के उल्लेख करत श्री चौबे ह कहिन कि गरीब, गांव वाले मन अऊ किसान मन ल मदद करे के हौसला, हमार मुख्यमंत्री श्री भूपेश बघेल म हे। उमन जशपुर जिला के प्राकृतिक सौन्दर्य ल देखत इहां टूरिज्म ल बढ़ावा देहे के बात कहिन। कार्यक्रम ल विधायक श्री यू.डी.मिंज, रामपुकार सिंह, विनय भगत, बृहस्पति सिंह ह घलोक संबोधित करत जशपुर जिला के विकास बर मुख्यमंत्री ले सहयोग के आग्रह करिन। श्री सरजियस मिंज ह घलोक कार्यक्रम ल संबोधित करिन।

एखर से पहिली मुख्यमंत्री श्री भूपेश बघेल, कृषि मंत्री श्री रविन्द्र चौबे ह जशपुर महोत्सव म शासन के कई ठन विभाग कोति ले शासकीय योजना, कार्यक्रम अऊ उपलब्धि मन उपर आधारित प्रदर्शनी के अवलोकन घलोक करिन। ये बेरा म जशपुर नगरपालिका अध्यक्ष श्री हीरू राम निकुंज, माध्यमिक शिक्षा मंण्डल के सदस्य श्री पवन अग्रवाल संग आन जनप्रतिनिधि उपस्थित रहिन।


leave a comment